திருச்சி சீதாலட்சுமி ராமசாமி கல்லூரியின் பவள விழா: பெண்கள் கல்வி, தேசிய திட்டங்கள் மற்றும் நாட்டின் பொருளாதாரம் குறித்து மத்திய நிதியமைச்சர் நிர்மலா சீதாராமன் விரிவான உரை!

By Cholan News Last updated Oct 26, 2026

திருச்சி சத்திரம் பேருந்து நிலையம் அருகேயுள்ள புகழ்பெற்ற சீதாலட்சுமி ராமசாமி கல்லூரியின் 75-வது ஆண்டு பவள விழா மிக விமரிசையாக நடைபெற்றது. இவ்விழாவில் சிறப்பு விருந்தினராகப் பங்கேற்ற மத்திய நிதித்துறை அமைச்சர் நிர்மலா சீதாராமன், கல்லூரியின் பிளாட்டினம் ஜூபிலி மலரை வெளியிட்டு மாணவிகள் மத்தியில் உரையாற்றினார். பத்மபூஷண் ஸ்ரீ என். ராமசுவாமி ஐயர் கல்வி வளாகத்தின் கல்வி இயக்குநர் டாக்டர் கண்ணன் பஞ்சபகேசன் வரவேற்புரை ஆற்ற, நிர்வாகக் குழு உறுப்பினர் திருமதி மாதவி கண்ணன் முதன்மை விருந்தினரைச் சிறப்பித்தார்.

நிகழ்ச்சியில் பேசிய மத்திய அமைச்சர், 1951-ல் வெறும் 11 மாணவிகளுடன் சிறிய ஓட்டுக் கட்டிடத்தில் தொடங்கப்பட்ட இக்கல்லூரி, இன்று 4,500-க்கும் மேற்பட்ட மாணவிகள் கற்கும் பெருமைமிக்க நிறுவனமாக உருவெடுத்துள்ளது என்றார். மகரிஷி கார்வேவின் உத்வேகத்தால் வழக்கறிஞர் தொழிலைத் துறந்து பெண்கல்விக்காக உழைத்த பத்மபூஷன் ஸ்ரீ ராமசுவாமி அய்யரின் தியாகத்தை நினைவுகூர்ந்த அவர், கடந்த ஏழு ஆண்டுகளாக உயர்கல்வி சேர்க்கை விகிதத்தில் (GER) ஆண்களைவிட பெண்களின் சேர்க்கையே தொடர்ந்து அதிகரித்து வருவதைச் சுட்டிக்காட்டினார். மேலும், முதல் ஏழு நாக் (NAAC) அங்கீகாரம் பெற்ற கல்லூரிகளில் ஒன்றான இங்கு பல்வேறு தொழிற்கல்வி பயிற்சிகள் வழங்கப்படுவதையும், பவள விழாவை முன்னிட்டு 3,200 பேர் இணைந்து 75 திருக்குறள்களைப் பாடி நிகழ்த்திய உலக சாதனையையும் பாராட்டினார்.

- Advertisement -

பிரதமர் நரேந்திர மோடி தலைமையிலான அரசு பெண்களை நாட்டின் வளர்ச்சியில் முன்னணி சக்தியாக நிறுத்தியுள்ளது என்றும், முத்ரா திட்டத்தின் மூன்றில் இரண்டு பங்கு கடன்கள் பெண்களுக்குச் சென்றடைவதோடு ‘லட்சாதிபதி திதி’ திட்ட இலக்கு 6 கோடியாக உயர்த்தப்பட்டுள்ளது என்றும் அவர் தெரிவித்தார். தமிழகத்தின் பாதுகாப்புத் தொழில் வழித்தட மையமாக விளங்கும் திருச்சியில் உள்ள தொழிற்பேட்டைகள் மற்றும் ஐடிஐ நிறுவனங்களுடன் இக்கல்லூரி இணைந்து திறன் மேம்பாட்டு மையமாகச் செயல்பட வேண்டும் எனவும், 60,000 கோடி ரூபாய் செலவில் நவீனப்படுத்தப்படும் அரசு ஐடிஐ-களுடன் கைகோர்த்து மாணவிகளுக்கு சர்வதேச அளவிலான தொழில்நுட்பப் பயிற்சிகளும் நிதி எழுத்தறிவும் வழங்கப்பட வேண்டும் எனவும் அவர் வலியுறுத்தினார்.

தொடர்ந்து செய்தியாளர்களைச் சந்தித்த நிர்மலா சீதாராமன், அமெரிக்க டாலருக்கு நிகரான இந்திய ரூபாயின் மதிப்பு அரசு நிர்ணயிக்கும் ஒன்றல்ல, அது சந்தையின் போக்கிற்கு ஏற்ப இயற்கையாகவே சமநிலை அடையும் என்று தெளிவுபடுத்தினார். ரூபாயின் மதிப்பில் அதீத ஏற்ற இறக்கங்கள் ஏற்படாமல் இருப்பதை மட்டுமே ரிசர்வ் வங்கி கண்காணித்து வருகிறது என்றார். சிறப்பு வாக்காளர் தீவிர திருத்தம் தொடர்பான விவகாரம் உச்ச நீதிமன்றத்தின் விசாரணையில் உள்ள சூழலில், எதிர்க்கட்சிகள் சட்டரீதியாக அணுகுவதை விடுத்து அரசியல் போராட்டங்களை மேற்கொள்வதாகக் குறிப்பிட்டார். தமிழக அரசின் கடன் சுமை குறித்து மாநில எதிர்க்கட்சிகள் சட்டமன்றத்தில் விவாதிப்பதே மக்களுக்குத் தெளிவைத் தரும் எனவும் தெரிவித்தார்.

மேலும், 2014 முதல் செயல்பட்டு வரும் அமைச்சர்கள் குழு மூலமாக உணவு மற்றும் அத்தியாவசியப் பொருட்களின் விநியோக மேலாண்மை உறுதி செய்யப்பட்டு பணவீக்கம் திறம்படக் கட்டுப்படுத்தப்பட்டு வருகிறது என்றார். கொரோனா காலப் பின்னடைவுக்குப் பிறகும் மத்திய அரசின் நிதி மேலாண்மையால் நாட்டின் கடன் சுமை படிப்படியாகக் குறைக்கப்பட்டு வருவதாகவும், 2030-க்குள் மொத்த உள்நாட்டு உற்பத்தியில் (GDP) கடன் விகிதத்தை 50 சதவீதமாகக் குறைக்கும் இலக்கை நோக்கி நாடு முன்னேறி வருவதாகவும் அயலக அமைப்புகளின் தரவுகளைச் சுட்டிக்காட்டினார். மேற்காசிய போர் சூழலால் கச்சா எண்ணெய் விலை உயர்ந்த போதிலும், உள்நாட்டில் பெட்ரோல் மற்றும் அத்தியாவசியப் பொருட்களின் விலை உயர்வு பொதுமக்களைப் பாதிக்காத வண்ணம் மத்திய அரசு தொடர்ந்து துரித நடவடிக்கைகள் எடுத்து வருவதாக அவர் எடுத்துரைத்தார்.

#Trichy #NirmalaSitharaman #SRCCollege #PlatinumJubilee #WomenEmpowerment #IndianEconomy #FinancialLiteracy #SkillDevelopment #CurrentNews