- Advertisement -
திருச்சியில் தமிழ்நாடு அரசு கிராம சுகாதார செவிலியர் நலச்சங்கத்தின் முப்பெரும் விழா: 9 முக்கிய கோரிக்கைகளை வலியுறுத்தி தீர்மானம்!
திருச்சி:
திருச்சி மாவட்டத்தில், தமிழ்நாடு அரசு கிராம சுகாதார செவிலியர் நலச்சங்கம் மற்றும் தமிழ்நாடு அரசு கிராம, பகுதி, சமுதாய சுகாதார செவிலியர்கள் கூட்டமைப்பு சார்பில் மாநில பொதுக்குழு, சர்வதேச தாதியர் நாள் மற்றும் அரசுப் பணி நிறைவு செய்யும் மாநில நிர்வாகிகளுக்குப் பாராட்டு விழா ஆகிய முப்பெரும் விழா மாநிலத் தலைவர் க.மீனாட்சி தலைமையில் மிகச் சிறப்பாக நடைபெற்றது.
விழாவிற்கு வந்திருந்தவர்களை மாநிலத் துணைத்தலைவர் சு.விமலா தேவி வரவேற்றுப் பேசினார். மாநிலத் துணைத்தலைவர்கள் க.செல்வமணி, இரா.வசந்தா, பா.அமிர்தவள்ளி, மாநில இணைச்செயலாளர் கோ.லதா, துணைச்செயலாளர் மை.ஃபிரிடா ஜெயக்கனி, அமைப்பு செயலாளர் வி.பிருந்தா, பிரச்சார செயலாளர்கள் ப.எஸ்தர் ராஜகுமாரி, சை.மெரசி கிளாரா, தலைமை நிலைய செயலாளர் ஜா.வான்மதி மற்றும் தணிக்கையாளர் அ.இராஜகுமாரி ஆகியோர் முன்னிலை வகித்தனர். செயல் தலைவர் க.கோமதி வாழ்த்துரை வழங்கினார்.
இவ்விழாவில் கிராம சுகாதார செவிலியர்களின் வாழ்வாதாரம் மற்றும் பணிப் பாதுகாப்பு சார்ந்த 9 முக்கிய கோரிக்கைகளை முன்வைத்து, பொதுச் செயலாளர் ம.காயத்ரி தேவி, இணைச்செயலாளர் ஆ.பாலாம்பிகை, மாநில ஒருங்கிணைப்பாளர்கள் இரா.இந்திராணி, மு.ஜெசிந்தா, நெல்லை செயலாளர் வி.சேசு இன்னாசி அஜிதா, புதுக்கோட்டை மாநில அமைப்பாளர் ம.மெர்சி, திருச்சி மாவட்டச் செயலாளர் ம.சாந்தி, திருச்சி மாவட்ட இணைச் செயலாளர் உமா காந்தி, திருச்சி மாவட்டப் பொருளாளர் அர்ச்சனா ஆகியோர் கோரிக்கை உரையாற்றினர்.
மாநாட்டில் நிறைவேற்றப்பட்ட முக்கிய கோரிக்கைகள்:
பாலின பாகுபாடற்ற நிலை-1: நவீன தீண்டாமையை உடனடியாகக் கைவிட்டு, கிராம சுகாதார செவிலியர்களுக்குப் பாலின பாகுபாடற்ற நிலை-1 (கி.சு.செ) வழங்கப்பட வேண்டும்.
பணி மூப்பு பட்டியல் விபரம்: கிராம சுகாதார செவிலியரின் பணி மூப்பு பட்டியல் எதன் அடிப்படையில் திருத்தம் செய்யப்பட்டது என்பது குறித்து எழுத்துப்பூர்வமான விளக்கத்தையும், அரசாணை நகலையும் வழங்க வேண்டும்.
பணி அங்கீகாரம்: கிராம சுகாதார செவிலியர்கள் செய்யும் தாய் சேய் நலப்பணிகளை, இடைநிலை சுகாதார செவிலியர்கள் செய்வதாக தவறான அறிக்கை அனுப்புவதை உடனடியாக நிறுத்த வேண்டும்.
பட்டயச் சான்று: 24 மாதங்கள் துணை செவிலியராகப் பயிற்சி முடித்தவர்கள் அனைவருக்கும் உரிய பட்டய சான்றை வழங்க வேண்டும்.
பயிற்சி சான்றிதழ்: இடைநிலை சுகாதார பணியாளர் பயிற்சியினை நிறைவு செய்த துணை செவிலியர்களுக்கு உடனடியாக சான்று வழங்கப்பட வேண்டும்.
குடியிருப்பு வாடகை ரத்து: புதியதாகக் கட்டப்பட்ட, வசிக்கத் தகுதியற்ற நலவாழ்வு நிலையங்களுக்கு வாடகை பிடித்தம் செய்வதை நிறுத்த வேண்டும். பழைய கட்டிடங்களுக்கு அரசாணையின்படி வாடகையற்ற குடியிருப்புகளை உறுதி செய்ய வேண்டும்.
50% இடஒதுக்கீடு: தமிழ்நாடு அரசால் நடத்தப்படும் செவிலியர் பயிற்சிப் பள்ளிகளில் 50 விழுக்காடு இடங்களை துணை செவிலியர்களுக்கு ஒதுக்கீடு செய்ய வேண்டும்.
நிதி வெளிப்படைத்தன்மை: களப்பணிக்கு கிராம, பகுதி, சமுதாய சுகாதார செவிலியர்களுக்குத் துறையால் ஒதுக்கப்படும் நிதி நிலவரங்களை குறுஞ்செய்தி (SMS), பகரி (WhatsApp), மின்னஞ்சல் மூலம் வெளிப்படையாகத் தெரிவிக்க வேண்டும்.
இருசக்கர வாகன வசதி: துணை சுகாதார நிலைய உடைமையாக, எரிபொருள் பராமரிப்புச் செலவுடன் கூடிய இருசக்கர வாகனங்களைச் செவிலியர்களுக்கு அரசு வழங்க வேண்டும்.
விழாவின் நிறைவாக மாநிலப் பொருளாளர் மா.சந்தானலெட்சுமி நன்றி கூறினார். இக்கூட்டத்தில் மாநில, மாவட்ட நிர்வாகிகள் மற்றும் தமிழகத்தின் பல்வேறு பகுதிகளில் இருந்து வந்திருந்த ஏராளமான கிராம சுகாதார செவிலியர்கள் கலந்துகொண்டனர்.
#திருச்சி #கிராமசுகாதாரசெவிலியர்கள் #முப்பெரும்விழா #தாதியர்நாள் #செவிலியர்கோரிக்கைகள் #தமிழ்நாடுஅரசு #சுகாதாரத்துறை #Trichy #NurseDay #HealthWorkers #TamilNaduNews
- Advertisement -
Comments are closed.