திருமயம் எய்ம் அறக்கட்டளை சார்பில் இலவச மருத்துவ முகாம்: ஏராளமான பொதுமக்கள் பயனடைந்தனர்!
திருமயம் | அக். 11:
புதுக்கோட்டை மாவட்டம் திருமயம் ஊராட்சி மன்ற வளாகத்தில் உள்ள சமுதாயக் கூடத்தில், எய்ம் அறக்கட்டளை சார்பில் மாபெரும் இலவச மருத்துவ முகாம் இன்று சிறப்பாக நடைபெற்றது.
புதுக்கோட்டை மாவட்ட பார்வை இழப்பு தடுப்பு சங்கத்தின் அனுமதியுடன் நடைபெற்ற இம்முகாமில், கிருஷ்ணன் கோவில் சங்கரா கண் மருத்துவமனை, காரைக்குடி கிட்னி மற்றும் ஸ்பெஷாலிட்டி மருத்துவமனை மற்றும் திருப்பத்தூர் சங்கீதா பல் மருத்துவமனை ஆகியவை இணைந்து பொதுமக்களுக்கு விரிவான மருத்துவச் சேவைகளை வழங்கின.
- Advertisement -
இன்று காலை 9 மணியளவில் தொடங்கிய இந்த முகாமில், திருமயம் மற்றும் அதன் சுற்றுவட்டார கிராமங்களைச் சேர்ந்த ஆண்கள், பெண்கள் என ஏராளமான பொதுமக்கள் ஆர்வத்துடன் கலந்துகொண்டனர். பொது மருத்துவம், சிறுநீரகம், கண் மற்றும் பல் உள்ளிட்ட பல்வேறு பிரிவுகளின் கீழ் சிறப்பு மருத்துவர்கள் பொதுமக்களுக்கு பரிசோதனைகளும் ஆலோசனைகளும் வழங்கினர்.
முகாமில் கண் பரிசோதனை செய்யப்பட்டு, அறுவை சிகிச்சை தேவைப்படும் நபர்கள் தனியாகத் தேர்ந்தெடுக்கப்பட்டனர். இவர்கள் சங்கரா மருத்துவமனை நிர்வாகத்தின் மூலம் அழைத்துச் செல்லப்பட்டு, முற்றிலும் இலவசமாக அறுவை சிகிச்சை செய்யப்பட்டு மீண்டும் அனுப்பி வைக்கப்பட உள்ளதாகத் தெரிவிக்கப்பட்டுள்ளது.
நிகழ்ச்சியின் தொடக்கத்தில் சிறப்பு விருந்தினர்களாகக் கலந்துகொண்ட காவல்துறை சார்பு ஆய்வாளர் (SI) கனகராஜ், சிறப்பு சார்பு ஆய்வாளர் (SSI) காமராஜ் மற்றும் முன்னாள் ஊராட்சி மன்ற தலைவர் சிக்கந்தர் ஆகியோர் வாழ்த்துரை வழங்கிப் பேசினர்.
அனைத்து மருத்துவச் சேவைகளும் இலவசமாக வழங்கப்பட்டதால் பொதுமக்கள் மிகுந்த மகிழ்ச்சி அடைந்தனர். முகாமின் நிறைவாக எய்ம் அறக்கட்டளை தலைவர் எம். சைமன் நன்றியுரை ஆற்றினார்.
#Thirumayam #AIMTrust #FreeMedicalCamp #Pudukkottai #HealthcareForAll #SankaraEyeHospital #MedicalNews #TamilNaduNews
- Advertisement -
Comments are closed.