”திருவெறும்பூர் தொகுதி வளர்ச்சிப் பாதையில் பயணிக்கிறது!” – திருச்சியில் அமைச்சர் அன்பில் மகேஷ் பொய்யாமொழி உறுதி

By Cholan News Last updated Mar 30, 2026

- Advertisement -

திருச்சி மாவட்ட காங்கிரஸ் அலுவலகமான அருணாச்சல மன்றத்தில் இன்று மதச்சார்பற்ற முற்போக்கு கூட்டணியின் வேட்பாளர்கள் சந்திப்பு நடைபெற்றது. இதில் திருவெறும்பூர் தொகுதி வேட்பாளர் அமைச்சர் அன்பில் மகேஷ் பொய்யாமொழி, கிழக்கு தொகுதி வேட்பாளர் இனிகோ இருதயராஜ் மற்றும் மணப்பாறை தொகுதி வேட்பாளர் அப்துல் சமது ஆகியோர் கலந்துகொண்டு காங்கிரஸ் நிர்வாகிகளிடம் ஆதரவு திரட்டினர்.

நிர்வாகிகள் வரவேற்பு

இந்த நிகழ்வில் காங்கிரஸ் மாநகர் மாவட்ட தலைவர் ரெக்ஸ், புறநகர் தெற்கு மாவட்ட தலைவர் ராஜலிங்கம், வடக்கு மாவட்ட தலைவர் சரவணன் ஆகியோர் வேட்பாளர்களுக்கு பொன்னாடை அணிவித்து உற்சாக வரவேற்பு அளித்தனர். இதில் திமுக மற்றும் கூட்டணி கட்சிகளைச் சேர்ந்த ஏராளமான நிர்வாகிகள் மற்றும் தொண்டர்கள் கலந்து கொண்டனர்.

செய்தியாளர் சந்திப்பில் அமைச்சர் பேசிய முக்கிய அம்சங்கள்:

1. மூன்றாவது முறையாக வாய்ப்பு:

”என் மீதும் என் தொகுதி மக்கள் மீதும் முதல்வர் வைத்துள்ள நம்பிக்கையின் அடிப்படையில் தான் மூன்றாவது முறையாக திருவெறும்பூர் தொகுதியில் போட்டியிட எனக்கு வாய்ப்பு வழங்கப்பட்டுள்ளது. இதற்கு முதல்வருக்கு நன்றியைத் தெரிவித்துக் கொள்கிறேன்.”

2. தேர்தல் இலக்கு:

திருச்சி கிழக்கு, திருவெறும்பூர் மற்றும் மணப்பாறை ஆகிய மூன்று தொகுதிகளிலும் கூட்டணி வேட்பாளர்கள் நிச்சயம் வெற்றி பெறுவோம். எங்களது அரசின் சாதனைகளை மக்களிடம் நேரடியாகக் கொண்டு சென்று வாக்கு சேகரிப்போம். எங்களது பலமே தோழமைக் கட்சிகளின் நிர்வாகிகளும் தலைவர்களும் தான்.

3. டெல்லிக்கு எதிரான போர்:

இந்தத் தேர்தல் என்பது தமிழ்நாட்டிற்கும் டெல்லிக்கும் இடையிலான தேர்தல் என்று எங்களது தலைவர் தெளிவாகக் கூறிவிட்டார். எனவே, டெல்லி அணியை வீழ்த்துவதே எங்களது பிரதான இலக்கு.

4. காலை உணவுத் திட்டம்:

தமிழகத்தில் பள்ளி மாணவர்களுக்காகத் தொடங்கப்பட்ட காலை உணவுத் திட்டம் மிகப்பெரிய வரவேற்பைப் பெற்றுள்ளது. இத்திட்டத்தை மேலும் விரிவுபடுத்துவதாகக் கழகத் தலைவர் ஸ்டாலின் அறிவித்துள்ளார். இது மாணவர்களின் வாழ்வாதாரத்தை மேம்படுத்தும் மிகச்சிறந்த திட்டமாகும்.

5. தொகுதியின் வளர்ச்சி:

திருவெறும்பூர் தொகுதி தற்போது வளர்ச்சிப் பாதையை நோக்கிச் சென்று கொண்டிருக்கிறது.

ஏற்கனவே அறிவிக்கப்பட்ட 10 திட்டங்களில் 7 திட்டங்கள் முழுமையாக நிறைவேற்றப்பட்டுள்ளன.

மீதமுள்ள திட்டங்களும், தொகுதிக்கான பிரத்யேகத் தேர்தல் அறிக்கையில் இடம் பெறும் புதிய திட்டங்களும் விரைவில் செயல்படுத்தப்படும்.

நடிகர் விஜய் போட்டி குறித்த கேள்விக்கு:

“ஜனநாயக நாட்டில் யார் வேண்டுமானாலும் தேர்தலில் போட்டியிடலாம். தேர்தல் விதிமுறைகளை மீறாமல் யார் வேண்டுமானாலும் களமிறங்கலாம்” என்று அமைச்சர் சுருக்கமாகப் பதிலளித்தார்.

இந்தச் சந்திப்பைத் தொடர்ந்து, கூட்டணி கட்சியினருடன் இணைந்து தொகுதி முழுவதும் தீவிர வாக்கு சேகரிப்பில் ஈடுபட வேட்பாளர்கள் திட்டமிட்டுள்ளனர்.