லால்குடி அருகே 1000 ஆண்டுகள் பழமையான சிவாலயத்தில் நவராத்திரி விழா: பரதநாட்டிய நாட்டியாஞ்சலி கோலாகலம்!

By Cholan News On Oct 19, 2026

திருச்சி:

திருச்சி மாவட்டம் லால்குடி வட்டம், அரியூர் கிராமத்தில் அமைந்துள்ள சுமார் 1000 ஆண்டுகள் பழமை வாய்ந்த அருள்மிகு ஸ்ரீ தில்லைநாயகி அம்பிகா சமேத ஸ்ரீ திருவேஸ்வரமுடையார் ஆலயத்தில், நவராத்திரி திருவிழாவை முன்னிட்டு நடைபெற்ற பரதநாட்டிய நிகழ்ச்சி பக்தர்களை வெகுவாகக் கவர்ந்தது.

- Advertisement -

இவ்வாலயத்தில் ஆண்டுதோறும் நவராத்திரி உற்சவம் விமரிசையாகக் கொண்டாடப்படுவது வழக்கம். அந்த வகையில், இந்த ஆண்டிற்கான நவராத்திரி பெருவிழா கடந்த ஒரு வாரமாகச் சிறப்பு வழிபாடுகளுடன் நடைபெற்று வருகிறது. விழாவின் ஒவ்வொரு நாளும் ஸ்ரீ திருவேஸ்வரமுடையாருக்கும், ஸ்ரீ தில்லைநாயகி அம்பாளுக்கும் சிறப்பு மகா அபிஷேகம், தீபாராதனைகள் நடத்தப்பட்டு, பல்வேறு விசேஷ அலங்காரங்களில் சுவாமியும் அம்மனும் பக்தர்களுக்குக் காட்சியளித்து வருகின்றனர்.

இதன் தொடர்ச்சியாக, நேற்று இரவு மூலவர் மற்றும் உற்சவ மூர்த்திகளுக்குப் பட்டு வஸ்திரங்கள், வண்ண மலர்களால் சிறப்பு அலங்காரம் செய்யப்பட்டு மகா தீபாராதனை நடைபெற்றது. இதில் அரியூர் மற்றும் அதன் சுற்றுவட்டாரப் பகுதிகளைச் சேர்ந்த திரளான பக்தர்கள் கலந்துகொண்டு சுவாமி தரிசனம் செய்தனர்.

பூஜை வழிபாடுகளைத் தொடர்ந்து, நவராத்திரி விழாவின் முக்கிய நிகழ்வாகத் திருக்கோவில் வளாகத்தில் பரதநாட்டிய நிகழ்ச்சி அரங்கேறியது. கலைஞர்களின் நளினமான நடன அசைவுகளும், பக்திப் பாடல்களுக்கான அபிநயங்களும் அங்கு திரண்டிருந்த பக்தர்களை மெய்சிலிர்க்க வைத்தன. விழாவில் பங்கேற்ற அனைவருக்கும் பிரசாதம் வழங்கப்பட்டது.

#Trichy #Lalgudi #Ariyoor #Navarathri #Navarathri2024 #TempleFestival #Bharatanatyam #ShivaTemple #TamilNaduTemples #TrichyNews