- Advertisement -
திருவெறும்பூர் அருகே ஆவணங்களின்றி கொண்டு வரப்பட்ட ₹2 லட்சம் பறிமுதல்!
திருச்சி: தமிழக சட்டமன்றத் தேர்தல் நடத்தை விதிகள் அமலுக்கு வந்துள்ள நிலையில், திருவெறும்பூர் அருகே காரில் உரிய ஆவணங்களின்றி கொண்டு செல்லப்பட்ட 2 லட்சம் ரூபாயை தேர்தல் பறக்கும் படையினர் பறிமுதல் செய்தனர்.
தேர்தல் நடத்தை விதிகள் அமல்
தமிழகத்தில் சட்டமன்றத் தேர்தல் வரும் ஏப்ரல் 23-ஆம் தேதி நடைபெற உள்ளது. இதனை முன்னிட்டு, தேர்தல் நடத்தை விதிமுறைகள் நேற்று முதல் மாநிலம் முழுவதும் அமலுக்கு வந்தன. வாக்காளர்களுக்குப் பணம் மற்றும் பரிசுப் பொருட்கள் விநியோகிக்கப்படுவதைத் தடுக்க, தேர்தல் ஆணையம் தீவிர கண்காணிப்புப் பணிகளை மேற்கொண்டு வருகிறது.
தீவிர வாகன சோதனை
இதன் ஒரு பகுதியாக, தமிழகம் முழுவதும் ஆங்காங்கே தேர்தல் பறக்கும் படையினர் அமைக்கப்பட்டு, தீவிர வாகன சோதனையில் ஈடுபட்டு வருகின்றனர்.
திருவெறும்பூர் சட்டமன்றத் தொகுதிக்குட்பட்ட பெரிய சூரியூர் சாலை பகுதியில், ‘டீம் B’ பிரிவைச் சேர்ந்த அதிகாரி நாகலட்சுமி தலைமையிலான தேர்தல் பறக்கும் படையினர் இன்று வாகன சோதனையில் ஈடுபட்டிருந்தனர்.
₹2 லட்சம் பறிமுதல்
அப்போது அந்த வழியாக வந்த கார் ஒன்றை நிறுத்தி அதிகாரிகள் சோதனை செய்தனர். விசாரணையில், அந்தக் கார் திருச்சி காட்டூர் மஞ்சத்திடலைச் சேர்ந்த ராமகிருஷ்ணன் என்பவருக்குச் சொந்தமானது எனத் தெரியவந்தது. காரைச் சோதனையிட்டபோது, அதில் உரிய ஆவணங்கள் இன்றி 2 லட்சம் ரூபாய் ரொக்கம் இருந்தது கண்டறியப்பட்டது.
இதையடுத்து, அந்தப் பணத்தை அதிகாரிகள் உடனடியாகப் பறிமுதல் செய்தனர். பறிமுதல் செய்யப்பட்ட தொகை, திருவெறும்பூர் தாலுகா அலுவலகத்தில் உதவி நடத்தும் அலுவலர் கார்த்திகேயனிடம் ஒப்படைக்கப்பட்டது.
தேர்தல் விதிமுறைகள் அமலில் இருப்பதால், பொது மக்கள் ₹50,000-க்கு மேல் ரொக்கமாக எடுத்துச் செல்லும்போது அதற்குரிய முறையான ஆவணங்களை வைத்திருக்க வேண்டும் என அதிகாரிகள் அறிவுறுத்தியுள்ளனர்.
- Advertisement -
Comments are closed.